ठाणे : ‘एखादा पुरस्कार स्वीकारणे म्हणजे मोठी जबाबदारी असते. मला मिळालेला कार्यसिद्धी पुरस्कार मी राज्यातील पूरग्रस्तांना समर्पित करीत आहे,’ अशा शब्दांत गायक, संगीतकार नंदेश उमप यांनी आपल्या भावना व्यक्त केल्या.
अस्मी स्टुडिओ व एट के मल्टिमीडिया यांच्यातर्फे आयोजित रंग मल्हार कार्यक्रमाच्या वेळी नंदेश उमप यांना त्यांच्या संगीत क्षेत्रातील योगदानाबद्दल कार्यसिद्धी पुरस्कार देऊन गौरवण्यात आले. खासदार राजन विचारे यांच्या हस्ते हा पुरस्कार देण्यात आला. ठाण्यातील सहयोग मंदिरमध्ये हा कार्यक्रम झाला. या वेळी ठाण्याच्या महापौर मीनाक्षी शिंदे, टिप टॉप हॉलचे रोहितभाई, अस्मी स्टुडिओच्या रूपाली तेलवणे, संदीप तेलवणे आदी उपस्थित होते.
पुरस्काराला उत्तर देताना नंदेश उमप म्हणाले, ‘आपल्याला आपल्या कार्याबद्दल मिळालेला पुरस्कार हा नवीन उभारी देणारा असतो, त्याबरोबर जबाबदारीची जाणीव करून देणारा असतो. सुरांच्या सागरात मी वडिलांमुळे पोहायला शिकलो. या सागरात एकदा शिरलो, की नवीन सूर गवसत जातात.’
पावसाच्या साक्षीने रंगलेल्या रंग मल्हार कार्यक्रमात बासरीवादक विवेक सोनार यांनी मल्हार रागासह विविध राग बासरीवर वाजवून रसिकांची दाद मिळवली. त्यांना अनुतोष दिघारिया यांनी तबल्यावर साथ दिली. दुसऱ्या सत्रात पंडित राम देशपांडे यांच्या सुश्राव्य गायनाने रसिक आनंदात न्हाऊन निघाले. त्यांना यती भागवत यांनी तबल्याची, तर अनंत जोशी यांनी हार्मोनियमची साथ दिली. श्रेयसी मंत्रवादी यानी कार्यक्रमाचे सूत्रसंचालन केले. कार्यक्रमाला रसिक प्रेक्षकांनी भरभरून प्रतिसाद दिला.